Sponsored hit pieces laban kina Christophe Bariou at Nadine Lustre, binatikos matapos ilantad ang isyu ng korapsyon sa Siargao
Matapos maglabas ng pahayag sina Christophe Bariou at Nadine Lustre hinggil sa matagal nang isyu ng korapsyon sa Siargao, sunod-sunod ang paglabas ng mga artikulong malinaw na naglalayong siraan ang dalawa, partikular na ang negosyo ni Christophe. Lumalabas ang mga questionable na artikulo na tila minadali at may layuning kontrolin ang narrative para pagtakpan ang mga matagal nang isyung lumulutang sa publiko.
Kapansin-pansin na ang mga artikulo ay sponsored at boosted pa, na nagmumukhang PR push imbes na lehitimong investigative journalism. Sa halip na sumunod sa ethical standards ng pamamahayag, mas inuuna pa ang promosyon kaysa sa masusing fact-checking—isang bagay na nagpapababa sa kredibilidad ng nilalaman.
Isa sa mga naging target ng atake ay ang Maison Bukana, negosyo ni Christophe, na inakusahan umanong “reclaimed land.” Ngunit kahit isang mabilis na tingin sa satellite images ay nagbibigay-linaw: walang ebidensya ng reclamation, walang basehan ang paratang. Malinaw na pilit lamang itong pinapalaki upang baluktutin ang katotohanan.
Kasabay ng mga isyung ito, matagal nang usap-usapan ang mabibigat na alegasyon laban sa pamilya Matugas sa Siargao. Kabilang dito ang umano’y maling paggamit ng pondo ng dating Governor Francisco “Lalo” Matugas, na nahaharap sa kaso dahil sa pag-realign ng ₱60M disaster funds, mga reklamong ghost projects at substandard infrastructure na konektado sa Boometrix, at ang pagkakabanggit kay Rep. Francisco Matugas sa listahan ng “cong-tractors” na sangkot umano sa iregularidad ng flood control projects.
Ang mga alegasyon ay dokumentado, naka-file, o kasalukuyang iniimbestigahan ng mga ahensya ng gobyerno, kaya’t hindi basta-basta maaaring ipagsawalang-bahala.
Sa kabuuan, masyadong kapansin-pansin ang timing at direksyon ng mga sponsored hit pieces laban kay Christophe at Nadine. Imbes na public interest ang layunin, malinaw na ito ay pambu-bully at harassment sa mga naglalakas-loob na magsalita tungkol sa mga isyung matagal nang idinaraing ng mga taga-Siargao.
Ang mabilis at organisadong pag-atake sa sinumang bumabangga sa status quo ay isa lamang patunay kung bakit kailangang may magtanong, may tumindig, at may magsabi ng totoong nangyayari—lalo na kung ang isyu ay tungkol sa kapakanan ng mas nakararami.